Events:
Maart 21, 2005: Mini Basketball Jamboree ... Tremendo!
Maart 6, 2005: Nesquik Mini Basketball Jamboree dia 18 di Maart
November 22, 2004: Tremendo Weganan di Mini i Girls Weekend ku a pasa

E MINI BASKETBALL JAMBOREE cu a wordo teni Dia 18 di Maart a bai tremendo. Ariba e canchanan di Aruba Jrs. for di 8 or di mainta 64 hungado di 10 pa 12 anja cu ta pertenece na e clubnan Aruba Jrs., C.P.B., Dakota y Estrella a wordo mescla den 8 diferente team di 8 hungador, cada un cu nan t-shirt cu color di nan team. E reglanan cu a wordo adapta special pa e jamboree aki a mustra di ta hopi bon, specialmente e concepto nobo cu Aruba Basketball Bond a bin cu ne cu ta e slider system tawata excelente ja cu e la duna tur mucha chance pa hunga. Door di mescla e hungadornan, e jamboree ta duna oportunidad na esnan cu ta participa pa enfoka mas ariba amistad y colegialidad. E premionan cu a wordo duna ta enfoka mas ariba esaki y e teamnan cu a gana premio tawata team AQUA consistiendo di Rayziel Thomas, Sergino Vis, Shaquille Nedd, Axel Rodriquez, Angie Gonzalez, Argyn Mathilda, Oswin Geerman y Syd Profeet cu a gana e premio pa e team cu mas fanatico. Team GRAY consistiendo di Lorenzo St. Jago, Jason Ulacio, Shawn Fernandes Pedra, Karren Cuaran Castillo, Yerlinson Jimenez, Jessica Ramirez, Justine Dania, Ozias Dormoy y Christopher Boezem cu a gana e premio pa e team cu e mihor comportacion. Team BLUE consistiendo di Carlo Profeet, Gavin Tromp, Chakaya Hazel, Harold Zuleta, Rymer Celaire, Joel Paredes, Carl Maikel Orman, y Juan David Sanchez cu a gana e premio pa mihor teamwork.

Nesquik a percura pa e t-shirts, premionan y tambe diferente regalo pa e fanaticonan. Durante di e dia a entrega certificadonan na e refereenan cu a participa na e curso di referee nivel 1. Refereenan cu hanja nan certificado ta inclui: Akeam Brouwers, Alexandra Croes, Allison Williams, Andre Kolman, Angelo Dario Bikker, Benny Richardson, David Tjon-Tam-Sin, Glenn Slijters, Gwendoline Kock, Hansel Pineda, Jonathan Wever, Leydy Perez-Sanchez, Octavio Woodley, Orlando Rasmijn, Prisca Kock, Renald Lang, Richard Brete, Richenella Richardson, Roland Croes, Rudy Croes, Shana Madia, David Leer y Rayborne Didder.

Aruba Basketball Bond kier agradeci un biaha mas tur esnan cu a haci e evento aki posible incluyendo tur e clubnan, e coachnan, e refereenan, e table officials, Aruba Jrs., e sponsor Nesquik y Ministerio di Cultura y Deporte cu a haci e evento aki posibel. E siman aki ta sigi mas actividad di Aruba Basketball Bond. Diamars, dia 22 di Maart, pa 7or lo tin un reunion di e clubnan pa repasa varios topico incluyendo e dia cu lo cuminsa e campeonato. Diaranson dia 23 pa 6:30 di atardi lo sigi e sessionnan di coach cual a wordo cambia y lo tuma lugar na YMCA San Nicolas. Encarecidamente ta pidi tur esnan cu lo ta presente na e dos reunion pa por favor ta na ora ja cu lo cuminsa na tempo. Tambe kier recorda tur esnan interesa cu e rulebooknan y e boeki cu regla geel lo ta obtenible durante e dos reunionnan aki na prijs special pa ultimo biaha. Despues nan lo bai bek na prijs regular.

Dia 18 di Maart, dia di Himno y Bandera, Aruba Basketball Bond lo organisa un Mini Basketball Jamboree pa hungadornan di mini cu ta pertenece na un di e clubnan asocia na Aruba Basketball Bond. E evento festivo aki lo cuminsa for di 8 or di mainta pa 3 or di atardi ariba e cancha di Aruba Jrs y ta priminti di bira algo spectacular. Aruba Basketball Bond a bin cu e idea nobo aki di hunga wega den forma di un jamboree pa permiti e coachnan cu a participa na e sessionnan di coach y e refereenan cu a sigi e curso di referee pa pone e experticio cu nan a caba di adquiri den practica den un ambiente mas agradable. E coachnan y refereenan a wordo aserca caba y e coachnan nobo lo dirigi e teamnan y e refereenan nobo e partidonan. Hungadornan di 10 pa 12 anja di e 4 clubnan cu tin mini, esta Aruba Jrs., C.P.B., Dakota y Estrella via di nan club a wordo invita pa participa na e jamboree y tur hungador lo hunga basta wega durante di dia. E reglanan a wordo adapta pa acomoda e weganan y cada wega lo dura 6 minuut cu un halftime di 30 seconde. Contrario na partidonan regular, e jamboree lo no enfoka ariba ganamento solamente pero ariba actionnan cu ta crea bon ambiente, amistad y colegialidad. Lo tin premio pa e team cu mas fanatico, e team cu e mihor comportacion y e team cu e mihor teamwork. Pa e evento nobo aki lo introduci un slider board system nobo cu ta garantisa cu tur hungador ta hunga tur wega. E slider lo identifica cua hungador mester ta den wega cada 3 minuut. Sponsor di e evento ta Nesquik cu a percura pa e t-shirts pa e hungadornan, e refereenan y e coachnan y tambe pa e premionan. Tambe lo tin diferente atraccion pa publico. Aruba Basketball Bond ta recorda tur fanatico di basketball pa reserva dia 18 di Maart, dia di Himno y Bandera pa bin forma parti di e festival di basketball aki. Entrada pa mucha bow di 13 anja ta gratis, bow di 18 anja solamente 1 florin y adulto Fls. 2.00. Durante di dia lo tin diferente regalo pa e fanaticonan. Ta recorda tur organisacion pa manda e lista di nomber di nan hungadornan di mini prome cu Dia 11 di Maart pa nan por participa.